CDF-Zotung Nih An Velh Mi Saya Ngan Ngan Cu A Hliamhma Thlawp Dingin Yangon Ah An Kalpi

Chin ramkulh, Matupi peng, Calṭhawng khuami Saya Ngan Ngan cu CDF-Zotung chungtel nih an tukvelh ruangah hliam faak ngai a pu i, Saya Ngan Ngan cu Hakha sii-inn ah zohkhenh a si nain dam lei a panh khawh lo ruangah Yangon lei ah an kalpi, tiah theih a si.

“Saya Ngan Ngan cu a hliamhma a cei ngai i Hakha sii-inn ah an ratpi. Zan khat a riah hnu ah sii-inn in a chuak i inn ah aa cawng. Hakha an ratpi nak hi nihnih hrawng a si cang. Asinain dam hlei lo in a um caah Yangon ah an lanhpi”, tiah Saya Ngan Ngan chungkhar he naihniam in a ummi pakhat nih The Chin Post ah a chim. Nihin August 12 zinglei ah Saya Ngan Ngan cu Hakha in Yangon lei ah an kalpi, tiah theih a si.

Saya Ngan Ngan tukvelh a tonnak kong ah The Chin Post nih Saya Ngan Ngan fapa cu phone in pehtlaihnak kan tuah ko nain lam caan a har i phone line a ṭhat lo caah pehtlaihnak kan tuah kho lo. Hi kong he pehtlai in CDF Zotung hruaitu pakhat nih The Chin Post a chimh ning ah, CDF Zotung chungtel nih Saya Ngan Ngan an tukvelh hi July 31 zaan ah a cang mi a si.

CDF Zotung cheukhat nih Calṭhawng khua mi cu phaisa an kholh hna i, cu lio ah cun khuatlang bochanmi Saya Ngan Ngan nih thawhbur a tam caah khuami an harnak kong a rak chim ruangah July 31 zan ah Saya Ngan Ngan cu CDF Zotung chungtel cheukhat nih an auh i, an tukvelh, tiah theih a si.

“Saya Ngan Ngan a veltu CDF Zotung chungtel cheukhat hi CDF zotung nih vun chimhhrim awk an ṭha ti lo. CDF Zotung hi phu hnih bantuk in kan kal i, annih hi phu dang deuh an si,” tiah CDF Zotung in ṭuanvo ngeitu pakhat nih cun a chim. Saya Ngan Ngan a veltu CDF Zotung phu dang hna hi pehtlaihnak kan tuah kho rih hna lo. Crd. The Chin Post