Nizaan August 1, Chin ramkulh Tongzang khuachung Chin ralkap le SAC ralkap kahdohnak ah CDF- Hualngoram ralkap Salai Lalramchuana a nunnak a liam tiah theih a si.
“Tonzang khuachung ummi SAC ralkap kan va luhhnawh hna i kaphnih kar kahdohnak ah kanmah lei in pasalṭha pakhat nih ram ca ah a nunnak a pek, SAC ralkap lei in a thimi le a hliammi an tam nain fiang in theih a si rih lo,” tiah Chin ralbawi pakhat nih The Chin Post ah a chim.
Nizaan Tongzang khuachung kahdohnak ah CNA, CDF- Hualngoram, CDF-KKG , CDF- Tonzang le PDA hna an i bawm, tiah theih a si.
Relchap: Sagaing ramṭhen, Kalay pengkomh ah SAC nih a chuahmi Ks. 20,000 tlap cu hman lo ding in Kalay pengkomh pah kah phah nih ralrin peknak an thanh. SAC nih phaisa tlap thar a chuahmi Ks. 20,000 ca cu dohthlennak a tuahtu hna hmunram chung ah hmannak nawl kan pe lo, hmuh a si ahcun sualphawtnak tuah an si lai, tiah nizan July 31 ah an langhter.
“Kanmah le ṭuanvo laknak hmun pengkomh cio in kan kham. Hmundang pengkomh cio zong ah an kham cio lai kan zumh. Minung pakhat sin in SAC nih a chuahmi Ks. 20,000 tlap voi thum tiang kan hmuh ahcun upadi ning in dantatnak kan tuah lai,” tiah Kalay pengkomh pah kah phah in ṭuanvo ngeitu pakhat nih a chim.
Mipi sinin Ks. 20,000 tlap hmuh a si ahcun a voi khatnak ah an phaisa chuh le hrawhpiak an si lai, a voi hnihnak an hman hmuh ṭhan a si ahcun ralrinnak pek an si lai i, voi thumnak tiang tlaih an si ahcun upadi ning in dantat an si lai, tiah an langhter.
Ks 20,000 tlap cu chawhleh chawhrawlnak a tuahtu, puai-sa le Non-CDM hna sin ah an phawtzamh hmasa lai caah cu bantuk hna he pehtlaihnak tuah in dohthlennak a tuahtu hna hmunram ah hmuh a si ahcun chuh an si lai tiah ralrin peknak an thanh. July 27 ah SAC nih chuah an timhmi Ks. 20,000 tlap cu phungning lo in chuahmi a si tiah NUG nih an rak thanh cang.
Leave a Reply