Sagaing ramṭhen, Tamu peng, Khampat khuapi No.2 sang cu July 28 zing ah SAC ralhrang nih an luhhnawh caah kahdohnak a chuak. Meithal puahkeh thawng a daih hnu ah Cycle pakhat in a zaammi unau hna cu SAC ralhrang nih an kah hna caah a khal tu Lalremruata (Kum 26) cu a nunnak a liam i Lalzirliana (Kum 35) nih hliamhma a tuar caah thlopbul cuahmah lio a si, tiah kan theih.
Nunnak liammi Lalremruata cu Kalaymyo klhuapi ah a ruak an kalpi i an vui. Zanlei suimilam 2:00 renglo ah Kalaymyo khuapi in Helicopter 2 a rawk zung i pumpululh chuihnak hmun certual ah SAC ralhrang a chiah hna hnu ah a dang pakhat nih sangchung um mipi inn pawl a kah hna, tiah theih chih a si.
Khampat khuapi ah July 22 zan thok in nihin tiang SAC ralhrang le tualchung hriamtlai ṭangṭi phufonh karlak ah kahdohnak pehtlai in a chuah caah tualchungmi 2,000 leng ral an hrial i mipi 3 an nunnak a liam cang, tiah kan theih.
Sagaing ramṭhen, Budalin peng, Ywarthar khua le Kyetyoekone khua karlak ah kahdohnak a chuak i SAC ralhrang bawi bo(2) 1 telh in 4 an thi, tiah Student Armed Force in ṭuanvo ngeitu pakhat nih a chim. July 28 zan ah Budalin pengchung ah rallam sialmi SAC ralhrang thazaang 100 hrawng nih mipi cheukhat an tlaih hna i an hrem hna hnu ah an thilri zong an fiarpiak hna caah mipi ralkap ṭangṭi phu hna nih an bawh hna i an kah hna hi a si, tiah theih a si.
“Minute 10,15 chung hrawng naih tein kahdohnak a chuah hi a si. SAC ralhrang pawl cu atu tiang Budalin pengchung ah an um ko rih. Bo-2 1 telh in 4 an thi pinah hliamhma a pumi zong an tam ngai” tiah a cunglei upa nih Khit Thit ah a chim. Kahdohnak cu Student Armed Force, Anonymous Hero (Local PDF) le tualchung hriamtlai ṭangṭi phufonh hna kan si i mipi ralkap lei in nunnak liammi le hliamhma tuarmi kan um lo, tiah an langhter chih.
Leave a Reply