Thawngpang Tha: Hi Bantuk Hi Chin Mi Caah Theih A Nuam Taktak Mi Thanwgpang Cu A Si

Chin ramkulh, Kanpetlet peng ah thazaang 100 hrawng he rallam a sialtu SAC ralkap hna cu Chin ralkap le PDF phufonh nih an kah hna i SAC ralkap 20 an thi, tiah NUG runvennak vuanci zung nih nihin July 26 ah a thanh.

2023, July 24 zinglei suimilam 8:27 in suimilam 7:52 tiang Kanpetlet peng Mawchaung le Hlaingdot kar ah rallam a sialtu SAC ralkap ṭatmah 88 le khahlahyiah 304 in thazaang 100 hrawng cu tualchung ralkap phufonh nih an kah hna. Cu kahdohnak ah cun SAC ralkap 10 an thi, mipi ralkap lei in ralkap 4 hliamhma an tuar, tiah an thanh.

Cu ni ṭhiamṭhiam July 24, zaanlei suimilam 5:00 ah SAC ralkap ṭatmah 88 kuttang um, khahmahyiah 301/307 phufonh in thazaang 150 hrawng nih rallam an sial ṭhan caah CNA/CDF, PDF phufonh he kaphnih kar kahdohnak a chuak ṭhan. Cu kahdohnak ah cun SAC ralkap 10 an thi i, hliamhma tuar zong an tam. Tualchung ralkap phufonh lei in ralkap 5 hliamhma an tuar.

SAC ralkap hna nih Magway ramṭhen le Chin ramkulh uk ding in thazaang tampi he rallam an sial pinah hriamngan le vanlawng hmang in kahdohnak an tuah nain tualchung ralkap phufonh nih lungrual tein kan rak doh hna, tiah NUG runvennak vuanci zung nih a langhter.

Relchap: Khampat Khuami 1,000 Leng Cu Kalaymyo Ah An Zaam SAC ralkap le PDF kar kahdohnak a zual tuknak Sagaing ramṭhen, Tamu pengkomh Khampat khuami 1,000 leng cu Kalaymyo ah ralhrial in an zaam, tiah ralhrial bawmchantu hna nih an chim. Kahdohnak ruangah Khampat khuami hna cu India ram lei zong ah a zaammi an um ve i Kalaymyo khrihfa Biakinn le tualchung mi inn ah aa dormi zong an um, tiah ralhrial bawmchantu hna nih cun an chim.

“Inn 500 leng a umnak Khampat khuapi ah ahohmanh an um ti lo. Ralhrial mi hna ca ah puan cu chim lo ihnak hmanh a um lo. Furpi lio a si caah fikfa zong an tam i, khiangthawng zong kan pe kho hna lo, eidin tirawl lawng kan pek khawh hna,” tiah ralhrial bawmchantu hna nih an chim.July 23 in Khampat ah SAC ralkap le PDF kar kahdohnak a zual i July 25 zinglei zong ah SAC ralkap nih hriamngan voi tam tuk an kah.

Khampat khua ah a taang rihmi hna zong ralhrial bawmchantu hna nih an va chanh hna i ramlak ah an zaam, tiah theih a si. Khampat khuami ralhrial in a zaammi hna kong he pehtlai in SAC nih zeihmanh thawng an thanhmi a um rih lo pinah RFA nih SAC chimphuannak nawlngeitu Zaw Min Htun cu phone in pehtlaihnak an tuah ko nain a cohlang lo, tiah RFA nih an langhter.