Vawlei kan nun can hi a tawi tuk hringhran ko mu, pangpar bantuk a tu te i a rak par i a uai than colh mi menmen bantuk kan si ko e, ngeih a chia tuk hrunghran. Tu zong hi Youth Icon tang in mipi nih kan theih mi le a lar ngaingai mi Laldinpuia, Tualte cu nizan (July 24, 2023) ah khan Seventhday Hospital, Aizawlah a nunnak a liam tiah thawng kan theih.
A hlasak mi pawl lak ah mipi nih kan theih khawh bik nak ding ah cun ‘Beiseina thamral timi ah khan a si kha hla kha upa hngakchia nih an uar bik nak le an theih bik nak a lar nak bik hla a si. A kaltak mi a chungkhar le a krifabu an ngeihchiat nak vialte Bawipa nih hnem ko hna seh.
A tu ah a ruak hi an khua Tualte lei ah an kalpi an tlunpi cuahmah lio a si. Ngeihchiat nak a tong mi chungkhar Bawipa nih hnem ko hna seh.
Thawngpang dang: Manipur Meitei miphun le Tlangcungmi Kuki-Mizo-Chin hna buainak he pehtlai in Mizoram khualipi, Aizawl khuapi ah lamzawhnak an ngei i, lamzawhnak ahhin mining a thong leng an chuak. Manipur Kuki unau hna dirkamhnak an aupi leng ah nu pahnih taklawng in lamhrawnpi an si i, tlaihhrem an ton ruangah duhlonak an langhter.
Lamzawh hi zing suimilam 11 in thawk a si i, Chanmari kawn in phoih khat, Kulikawn in phoih khat ah kal in, Raj Bhavan pawng lamtonnak ah an i tong hna. Raj Bhavan lamtonnak hmun ah hin zapi caan hmannak an ngei i, NGO Co-Ordination Committee lei in ṭuanvo ngeitu nih caan a hruai. Central Young Mizo Association(CYMA) President, Mizo Upa Pawl(MUP) president le Mizo Hmeichhe Inzawmkhawm Pawl(MHIP) president cio nih biachimnak an ngeih leng ah Rev. Dr. C. Chawnghmingliana, Mizoram Synod Moderator hruainak zapi thlacamnak zong an ngei.
Hi caan hmannak ahhin Manipur Kuki unau le Meitei buainak kong ah rianrang in hmalaknak a um khawh nakhnga India central cozah cu an auhnawh i, Manipur Kuki unau vialte kan in dirkamh hna tiah an au. Lamzawhnak ah a chuak mi nih cataar phunphun an i ken i, Manipur Chief Minister N Biren Singh mawhchiatnak cataar hna zong hmuh ding a um. Tutan NGO Co-Ordination Committee tawlrel mi lamzawhnak ah hin All NGO nih biatung(resolution) panga(5) an chuahpi mi a um i, cu hna cu 1. Manipur ah remnak leh daihnak a um khawhnak ding ah India cozah fak piin cawlcang seh. 2. Demcracy a dir khawh nak ding ah Central cozah nih a tuanvo la seh.
3)Manipur ram buainak ruangah inn le lo hrawhpiak a tong mi, nunnak a liam mi le hliamtuar mi hna caah bawmhnak pek siseh. 4. Mizo nungak/ngaknu pahnih taklawng i khualak i chawhpi le tlaihhrem an ton mi kong he pehtlai in hi bantuk thil a tuahtu hna hi an i tlak ning in dantat si hna seh. 5. Manipur ram buainak ruang i N Biren Singh cozah nih Mizo miphun dan a tat mi hna le thong an thlak mi vialte hna hi chuahter si hna seh.
Leave a Reply