Sagaing ramthen Tamu peng Khampat khua ah ralhrang pawl nih an thahmi ruak pakhat cu July 26 zan ah an hmuh. Hi an thah mi Mithi hi chikhat te an inn le an lo va zoh ta dingin khuachung ah a va lut ta i culio ah cun ralhrang nih an rak kah colh ko tiah tuanvo neitu minung pakhat nih cun a chim.
Sagaing ramṭhen, Tamu peng, Khampat khuapi ah SAC ralhrang nih nihin July 26 zaan ah pa 1 an thah, tiah theih a si. SAC ralhrang nih an thahmi hi Khampat khuapi ah khuasami Mizo pa a si i ral an hrialnak hmun in a inn veh dingin a kal lio ah SAC ralhrang he an i ton caah atu bantukin an thah hi a si, tiah Zalen nih a ṭial.
Relchap: Indonesia palik nih phunglam lo in minung taksa cheukhat zuarnak konglam hi hlathlainak an tuah i Cambodia ram sii-inn pakhat ah Indonesia minung 122 (kal) zuar ding in a fialtu hna palik cheukhat, mipem mi hna bawmtu (immigration officer) le minung kal a cawtu hna cu phunglam lo in cawlcangnak a si tiah dohdal in thilsual tuahtu ah an puh hna tiah theih asi.
July 19, khan Indonesia palik ṭuanvo ngeitu hna nih minung taksa cheukhat zuar ding in a fialtu hna minung 12 an rak tlaih hna cu lak ah Palik officer le mipem mi hna bawmtu (immigration officer) pakhat zong an i tel chih. Indonesia palik nih phunglam lo in minung taksa zuar tawntu (human smuggling syndicate) hna cu pekzulh in kan dohdal peng lai tiah Jakarta police director for general crimes Hengki Haryadi nih a chim.
Innsaknak ah rianṭuan mi, Fimchimtu le a dang rianṭuannak bu (executive) zong an i telnak minung 122 kal zuarpiak ding in fialmi hna cu Indonesia ram ah an kir dih cang tiah Indonesia palik chung in ṭuanvo ngeitu pakhat nih a chim. A tu bantuk thil a cannak a ruang cu Covid-19 zawtnak ruang in tangka lei ah harsatnak tong mi cheukhat hna nih an taksa cheukhat zuar cu an hna tlaknak hi a si tiah Haryadi nih a chim.
Leave a Reply