August 1 ah SAC nih thongtla an luatter mi hna chung in chak lei tlangcung hriamtlai phu 4 in ralkap 22 zong an sual an ngaihthiam hna i an luatter hna, tiah theih a si.
“Luatnak kan pekmi hna chung in Ta’ang National Liberation Army(TNLA), Shan State Progressive Party/Shan State Army(SSPP/SSA), Myanmar National Democratic Alliance Army(MNDAA) le Arakan Army(AA) chungtel hna an i tel,” tiah SAC nih an langhter.
TNLA chungtel ralkap 16, MNDAA in ralkap 2, SSPP/SSA in ralkap 3 le AA ralkap 1 cu nizan August 1 ah SAC nih thonginn in an chuah hna, tiah theih a si.
Chak lei tlangcung hriamtlai phu chungtel ralkap 22 an thlahmi hna cu hi hnu ah sualnak nan tuah rih ahcun a hlan i a tangmi nan sualnak case relchih in thong thlak ṭhan nan si lai tiah SAC nih an chuah hna.
relchap: SAC nih phungning lo in an tlaih i, sualpuhnak phunphun an tuahmi rampi ruahnak petu Aung San Suu Kyi le president U Win Myint cu, sualpuhnak an tonmi zeimawzat SAC nih a hlawtpiak hna nain luatnak kan pe rih hna lo, tiah SAC nih a thanh.
Rampi ruahnak petu Suu Kyi cung ah sualpuhnak khinhmi phun 19 chung in phun 5 ca ah luatnak pek si i, president U Win Myint cu sualpuhnak khinhmi phun 8 chung in phun 2 ca ah luatnak pek a si, tiah SAC lei nih an thanh.
Atu bantuk in SAC nih sualpuhnak cheukhat ah luatnak a pek hna nain, Suu Kyi le president U Win Myint cung ah biakhiahnak tuah cang mi chung in thong thlak ding caan a taan rih caah luatnak taktak an hmu kho rih lo, tiah an langhter.
Kum 78 mi Aung San Suu Kyi ca ah sualpuhnak khinhmi phun 19 in kum 33 thong thlak ding in biakhiahnak tuahpiak a rak si i tutan sualpuhnak phun 5 ca ah luatnak a pek hnu in kum zeizat thong thlak ding a taan ti cu fiang in theih a si rih lo.
Leave a Reply